விஜய்யின் மகனும், இயக்குநராக அறிமுகமாக உள்ள ஜேசன் சஞ்சய் குறித்து பேசப்பட்டு வரும் நிலையில், தற்போது நடிகர் சூர்யா பகிர்ந்துள்ள ஒரு பழைய நினைவு ரசிகர்களை நெகிழ்ச்சியில் ஆழ்த்தியுள்ளது. தனது குடும்பம் கடினமான பொருளாதார சூழ்நிலையை சந்தித்த நேரத்தில் நடிகை ராதிகா சரத்குமார் செய்த உதவியை அவர் மனம் திறந்து பகிர்ந்திருப்பது சமூக வலைதளங்களில் அதிகம் பேசப்பட்டு வருகிறது.
கோவையில் நடைபெற்ற தனது புதிய திரைப்படமான ‘விஸ்வநாத் அண்ட் சன்ஸ்’ இசை வெளியீட்டு விழாவில் பேசிய சூர்யா, தம்பி கார்த்தி அமெரிக்காவில் படிக்கச் செல்ல விசா நடைமுறைக்காக வங்கிக் கணக்கில் குறிப்பிட்ட தொகை இருப்பதை காட்ட வேண்டியிருந்ததாக கூறினார். ஆனால் அந்த நேரத்தில் குடும்பத்தின் பொருளாதார நிலை அதற்கு சாதகமாக இல்லாததால் அனைவரும் கவலையில் இருந்ததாக அவர் தெரிவித்தார்.
அந்தச் சமயத்தில், தந்தை சிவகுமாருடன் பல படங்களில் இணைந்து நடித்திருந்த ராதிகா சரத்குமார் எந்த தயக்கமும் இல்லாமல் தேவையான பணத்தை கொடுத்து உதவியதாக சூர்யா நெகிழ்ச்சியுடன் நினைவுகூர்ந்தார். கார்த்திக்கு கல்லூரி சேர்க்கை உறுதியாகும் வரை அந்தத் தொகையை வங்கியில் வைத்திருக்கும்படி ராதிகா கூறியதாகவும், அந்த உதவியை தங்களது குடும்பம் என்றும் மறக்க முடியாது என்றும் அவர் தெரிவித்தார்.
ராதிகாவுக்கும் சிவகுமார் குடும்பத்துக்கும் இருந்த அந்த நெருக்கமான உறவு, ஒரு சாதாரண திரையுலக நட்பாக இல்லாமல், குடும்ப உறவாகவே மாறியிருந்தது. காலம் மாறினாலும் அந்த பாசமும் அக்கறையும் குறையவில்லை என்பதற்கு இந்த சம்பவமே மிகப்பெரிய எடுத்துக்காட்டு என ரசிகர்கள் கருத்து தெரிவித்து வருகின்றனர்.
இதுமட்டுமல்லாமல், தனது ஆரம்பகால திரைப்படங்களில் சிலவற்றில் ராதிகா எந்தவித சம்பளமும் பெறாமல் நடித்ததாகவும் சூர்யா கூறினார். அவ்வாறு செய்ய வேண்டிய அவசியம் அவருக்கு இல்லாதபோதிலும், தங்களின் வளர்ச்சிக்காக அவர் அளித்த அந்த ஆதரவு வாழ்நாள் முழுவதும் மறக்க முடியாத ஒன்றாக இருக்கும் என்று சூர்யா நெகிழ்ச்சியுடன் பகிர்ந்தார்.
இன்று ராதிகா அந்த நிகழ்ச்சியில் இல்லாவிட்டாலும், அவருடன் இணைந்து பணியாற்றிய எண்ணற்ற நினைவுகள் மனதில் நிறைந்திருப்பதாகவும், அவரை நினைக்கும் ஒவ்வொரு தருணமும் பல உணர்வுகளை ஏற்படுத்துவதாகவும் சூர்யா தெரிவித்தார். அவரது இந்த பேச்சு ரசிகர்களிடையே பெரும் வரவேற்பைப் பெற்றுள்ளது.
சூர்யா மற்றும் ராதிகா இதற்கு முன்பு ‘சந்திப்போமா’, ‘உயிரிலே கலந்தது’, ‘சிங்கம் 3’ உள்ளிட்ட திரைப்படங்களில் இணைந்து நடித்துள்ளனர். தற்போது வெங்கி அட்லூரி இயக்கியுள்ள ‘விஸ்வநாத் அண்ட் சன்ஸ்’ திரைப்படத்தில் இருவரும் தாய்-மகனாக நடித்துள்ள நிலையில், இது அவர்கள் இணைந்து நடித்துள்ள நான்காவது திரைப்படமாக அமைந்துள்ளது.
இந்தப் படத்தில் சர்வதேச பிஸ்டல் ஷூட்டிங் சாம்பியனாக சூர்யா நடித்துள்ள நிலையில், மமிதா பைஜு, ரவீனா டண்டன், நாசர், சுதா, பவானி ஸ்ரீ, காளி வெங்கட் உள்ளிட்ட பலரும் முக்கிய கதாபாத்திரங்களில் நடித்துள்ளனர். ரசிகர்கள் மத்தியில் பெரும் எதிர்பார்ப்பை ஏற்படுத்தியுள்ள ‘விஸ்வநாத் அண்ட் சன்ஸ்’ திரைப்படம் வரும் ஆகஸ்ட் 14-ஆம் தேதி உலகம் முழுவதும் திரையரங்குகளில் வெளியாக உள்ளது.