நடிகர் அஜித் துணிவு படத்தின் வெற்றியை அடுத்து, இப்போது விடாமுயற்சி படத்தில் நடித்து வருகிறார். இயக்குனர் மகிழ் திருமேனி இயக்கும் இப்படத்தில் நடிகை திரிஷா கதாநாயகியாக நடித்து வருகிறார். மேலும் நடிகர்கள் அருண் விஜய் , அர்ஜுன் தாஸ், ரெஜினா கசந்திரா உள்ளிட்ட பிரபலங்களும் படத்தில் முக்கிய கதாபாத்திரத்தில் நடித்து வருவதாகத் தகவல்கள் வெளியாகி உள்ளன.
இது தவிர விடாமுயற்சி படத்தின் வேறு எந்த அப்டேட்களும் வெளியாகாமல் உள்ளது. நடிகர் அஜித் விடாமுயற்சி படத்தை அடுத்து இயக்குனர் ஆதிக் ரவிச்சந்திரன் இயக்கும் படத்தில் நடிக்க உள்ளதாகவும் தகவல்கள் வெளியாகி உள்ளன. இதைத்தொடர்ந்து, அடுத்ததாக அஜித் எந்த இயக்குனரின் படத்தில் நடிக்கப் போகிறார் என்று அவரது ரசிகர்கள் மத்தியில் கேள்வி எழுந்தது.
இப்படியான சூழலில், இயக்குனர் வெற்றிமாறன் நடிகர் அஜித்தை வைத்து படம் எடுக்கப் போகிறார் என்ற செய்திகள் சோசியல் மீடியாவில் வெளியாகி உள்ளன. இந்த செய்தியை கேட்ட அஜித் ரசிகர்கள் மிகவும் உற்சாகத்துடன் உள்ளனர். அதே சமயம், வெற்றிமாறன் வாடிவாசல் படத்தை எடுக்கவில்லையா என்ற சந்தேகமும் எழுந்துள்ளது.
இயக்குனர் வெற்றிமாறன் விடுதலை 2 படத்தின் படப்பிடிப்பை முடித்ததும் சூர்யாவை வைத்து வாடிவாசல் படத்தை எடுக்கப் போவதாக செய்திகள் வெளியாகிக் கொண்டிருந்தன. மேலும், வாடிவாசல் படத்தில் இயக்குனர் அமீர் முக்கிய கதாபாத்திரத்தில் நடிக்க உள்ளார் என்றும் இயக்குனர் வெற்றிமாறன் அதிகாரப்பூர்வ அறிவிப்பை வெளியிட்டு இருந்தார்.
ஆனால் இப்போதைக்கு வாடிவாசல் படம் ட்ராப் ஆகிவிட்டதாகவும், இயக்குனர் வெற்றிமாறன் அடுத்ததாக அஜித்தை வைத்து தான் படம் எடுக்கப் போகிறார் என்றும் பிரபல சினிமா ஆய்வாளர் சுபேர் தெரிவித்துள்ளார். இப்படி திடீரென வாடிவாசல் படம் ட்ராப் ஆவதற்கு காரணம் என்னவென்பதையும் அவர் விவரித்துள்ளார்.
சமீப காலமாக, சோசியல் மீடியாவில் பருத்திவீரன் படம் தொடர்பான அமீர்-ஞானவேல்ராஜா பிரச்சனை தான் அதிகம் பேசப்பட்டு வருகிறது. மேலும் இந்த பிரச்சனையால் இயக்குனர் அமீருக்கும் நடிகர் சிவகுமார் குடும்பத்தினருக்கும் இடையே மனக்கசப்பு ஏற்பட்டுள்ளதாகவும் சொல்லப்படுகிறது. இதனிடையே வெற்றிமாறன் வாடிவாசல் படத்தில் கண்டிப்பாக அமீர் நடிப்பார் என்று அறிவித்திருந்தார்.
வாடிவாசல் படத்தில் அமீர் நடிப்பது நடிகர் சூர்யாவுக்கு பிடிக்கவில்லை எனவும், அதனால் சூர்யா இந்த படத்தில் இருந்து விலகி விட்டதாகவும் சுபேர் கூறியுள்ளார். அப்படி என்றால் வாடிவாசல் படத்தில் சூர்யாவிற்கு பதில் அஜித் நடிக்கப் போகிறாரா என்றால் இல்லை. கலைப்புலி தானு தயாரிக்விருந்த வாடிவாசல் படத்தில் சூர்யாவிற்கு பதில் வேறொரு ஹீரோவை நடிக்க வைப்பார்கள் என்று சொல்லப்படுகிறது.
எனவே, நடிகர் அஜித்தை வைத்து வெற்றிமாறன் வேறொரு படத்தை இயக்கப் போவதாக தகவல்கள் வெளியாகி உள்ளன. மேலும் இப்ப படத்தின் கதை சவுக்கு சங்கர் பற்றிய கதையாக இருக்கப் போகிறது என்றும் அதற்கு சவுக்கு சங்கரிடம் அனுமதி பெற்று விட்டதாகவும் சுபேர் கூறியுள்ளார். குறிப்பாக இந்த படத்திலும் அமீர் நடிப்பார் என்று சுபேர் தெரிவித்துள்ளார்.