ரஜினி நடிப்பில் பிரம்மாண்டமாக உருவாகிவரும் படம் ‘அண்ணாத்த’. சிறுத்தை சிவா இயக்கிவரும் இப்படத்தை சன் பிக்சர்ஸ் நிறுவனம் சார்பில் கலாநிதி மாறன் பிரம்மாண்டமாக தயாரித்து வருகிறார். இமான் இசையமைக்கும் இப்படத்தின் தீம் மியூசிக் ஏற்கெனவே வெளியாகி ரசிகர்களிடையே பெரும் வரவேற்பை பெற்றிருந்தது.
இந்நிலையில், இப்படத்தின் பர்ஸ்ட் லுக் போஸ்டரை இன்று விநாயகர் சதுர்த்தி நாளில் வெளியிடப்போவதாக படக்குழுவினர் தெரிவித்திருந்தனர். அதற்காக நேரத்தையும் குறிப்பிட்டு ஒரு போஸ்டரை வெளியிட்டிருந்தனர். அதன்படி, இன்று காலை 11.00 மணிக்கு இப்படத்தின் பர்ஸ்ட் லுக் போஸ்டரை படக்குழுவினர் அதிகாரப்பூர்வமாக வெளியிட்டனர்.
அந்த போஸ்டரில் ரஜினிகாந்த் பட்டு வேஷ்டி, சட்டையுடன் வெற்றியைக் கொண்டாடும் விதமாக நிற்கும் புகைப்படம் இடம்பெற்றுள்ளது. பின்னணியில் ஒரு திருவிழாக் கூட்டம் போலவும் காண்பித்துள்ளனர். இந்த போஸ்டரை ரசிகர்கள் உற்சாகமாக கொண்டாடி வருகின்றனர். விநாயகர் சதுர்த்தி நாளில் இந்த போஸ்டர் ரசிகர்களுக்கு உண்மையில் மிகப்பெரிய விருந்தாக அமைந்திருக்கிறது.
அதுமட்டுமில்லாமல், இன்று மாலை இப்படத்தின் மோஷன் போஸ்டரை வெளியிடப்போவதாக படக்குழுவினர் அறிவித்துள்ளனர். அதை காண ரசிகர்கள் ஆர்வமுடன் காத்திருக்கிறார்கள். இப்படத்தில் ரஜினிக்கு ஜோடியாக நயன்தாரா நடிக்கிறார். மற்றும் கீர்த்தி சுரேஷ், குஷ்பு, மீனா, சூரி, சதீஷ் உள்ளிட்டோரும் நடிக்கின்றனர்.