தமிழ் சினிமாவில் நடிப்புக்கு முக்கியத்துவமான கதாபாத்திரங்களை தேர்வு செய்து நடிப்பதில் கெட்டிக்காரர் நடிகர் சூர்யா. இவருடைய நடிப்பில் சமீபத்தில் ஓடிடி தளத்தில் வெளிவந்து ரசிகர்களிடையே பெரும் வரவேற்பை பெற்ற படம் ‘சூரரைப்போற்று’. இப்படத்தை சுதா கொங்காரா இயக்கியிருந்தார். 2D எண்டர்டெயின்மெண்ட் நிறுவனம் சார்பில் சூர்யா-ஜோதிகா இணைந்து தயாரித்திருந்தனர்.
இப்படம் பல்வேறு திரைப்பட விழாக்களில் திரையிட்டப்பட்டு, பலதரப்பட்ட ரசிகர்களின் வரவேற்பை பெற்றது. இந்நிலையில், இப்படத்திற்கு மீண்டும் உலக அளவில் மிகப்பெரிய கௌரவம் கிடைத்துள்ளது. அது என்னவென்றால், மெர்போர்ன் இந்திய சினிமா திரைப்பட விழாக்குழு ‘சூரரைப் போற்று’ படத்திற்காக சிறந்த நடிகர் விருதை சூர்யாவுக்கு வழங்கியுள்ளது.
கொரோனா காலக்கட்டத்தில் இந்த விருதை நேரடியாக வழங்க முடியாததால், அதை பார்சலாக சூர்யாவுக்கு அனுப்பி வைத்தது விழாக்குழு. அந்த பார்சலை சூர்யாவும், ஜோதிகாவும் இணைந்து பிரித்து, விருதை ரசிகர்களுக்கு காட்டும் வீடியோ தற்போது சமூக வலைத்தளத்தில் வைரலாக பரவி வருகிறது.
இந்த விருது‘சூரரைப் போற்று’ படத்திற்கும் நடிகர் சூர்யாவுக்கும் கிடைத்த மிகப்பெரிய அங்கீகாரமாக இது கருதப்படுக்கிறது. இதனை படக்குழுவினர் மிகுந்த சந்தோஷத்துடன் கொண்டாடி வருகின்றனர்.