நடிகர் விஜய் தமிழ் சினிமாவில் உச்சத்தை எட்டியுள்ள நிலையில், அடுத்த கட்டமாக அரசியலில் குதிப்பதற்கான வேலைகளில் தீவிரம் காட்டி வருகிறார். சமீபகாலமாக அவரது மேடைப் பேச்சுகளும், நடவடிக்கைகளும் அவர் எதிர்கால அரசியலுக்கு அடித்தளமிடுவதைக் காட்டுகிறது. இதனால் விஜய் ரசிகர்கள் தளபதி விரைவில் அரசியலுக்கு வருவார் என்று கொண்டாட்டத்தில் உள்ளனர்.
மற்றொரு பக்கம் திரைப் பிரபலங்கள் பலரும் விஜயின் அரசியல் வருகை குறித்து தங்களது கருத்துக்களை தெரிவித்து வருகின்றனர். அந்த வகையில் இயக்குனர் வெற்றி மாறனும் சமீபத்தில் விஜய் அரசியலுக்கு வருவது பற்றி பேசியுள்ளார். விஜயின் அரசியல் வருகை குறித்து செய்தியாளர்கள் எழுப்பிய கேள்விக்கு வெற்றிமாறன் பதிலளித்த வீடியோ காட்சிகள் தற்போது இணையத்தில் வைரலாகியுள்ளதால் விஜய் ரசிகர்கள் மத்தியில் பரபரப்பை ஏற்படுத்தியுள்ளது.
இயக்குனர் வெற்றிமாறன் 2007இல் நடிகர் தனுஷை வைத்து பொல்லாதவன் படத்தை எடுத்து ஹிட் கொடுத்தவர். இவர் தமிழ் சினிமாவில் இயக்குனராக அறிமுகமாவதற்கு முன்பு, இயக்குநர் பாலுமகேந்திராவிடம் உதவி இயக்குநராகப் பணிபுரிந்துள்ளார். தொடர்ந்து நடிகர் தனுஷ் கூட்டணியில், 2011இல் ஆடுகளம் படத்தை இயக்கி வெளியிட்டார். இப்படம் இவருக்கு தேசிய விருதுகளை அள்ளித் தந்தது.
தொடர்ந்து, விசாரணை, வடசென்னை, அசுரன் மற்றும் விடுதலை போன்ற ஹிட் படங்களை தமிழ் சினிமாவிற்குக் கொடுத்தார். இவர் கடைசியாக நடிகர் சூரியை வைத்து எடுத்த விடுதலை படத்திற்கு ரசிகர்கள் மத்தியில் அமோக வரவேற்பு கிடைத்தது. எனவே, இந்த படத்தின் இரண்டாம் பாகத்தை இப்போது எடுத்து வருகிறார். அடுத்த ஆண்டு இந்த படம் வெளியாகும் என எதிர்பார்க்கப்படுகிறது.
இப்படத்தை முடித்ததும் நடிகர் சூர்யாவை வைத்து வாடிவாசல் படத்தை எடுக்க உள்ளார். இப்படி அடுத்தடுத்த படங்களை இயக்குவதில் பிஸியாக இருக்கும் வெற்றிமாறன், சமீபத்தில் விஜய் அரசியலுக்கு வருவதற்கு முன்பு இதெல்லாம் பண்ண வேண்டும் என்று கண்டீஷன் போட்டுள்ளார். செய்தியாளர்கள் சந்திப்பில் பேசிய வெற்றிமாறன் “யார் வேண்டுமானாலும் அரசியலுக்கு வரலாம். இது அவர்களது தனிப்பட்ட விருப்பம் தான்.
ஆனால் அரசியலுக்கு வருவதற்கு முன் களத்தில் இறங்கி வேலை பார்ப்பது மிகவும் அவசியம். அதன் பிறகு அரசியலில் நுழைந்தால் நன்றாக இருக்கும்” என்று கூறியுள்ளார். இயக்குனர் வெற்றிமாறனின் இந்தப் பேச்சு நடிகர் விஜய்க்கு ஆலோசனை சொல்வது போல இருப்பதாக இணையத்தில் பலரும் விவாதித்து வருகின்றனர். பல்வேறு ஹிட் படங்களை இயக்கியுள்ள வெற்றிமாறன் இதுவரை விஜயை வைத்து ஒரு படம் கூட இயக்காத நிலையில், விஜய்யின் அரசியல் வருகை குறித்து அவர் பேசியிருப்பது பலரது கவனத்தையும் ஈர்த்துள்ளது.