பிக்பாஸ் நிகழ்ச்சியின் ஏழு சீசன்கள் முடிவடைந்த நிலையில், 8வது சீசன் வருகிற அக்டோபர் மாதம் தொடங்க உள்ளது. இந்நிகழ்ச்சியின் புரோமோ ஷூட்டும் விரைவில் தொடங்க இருந்த நிலையில், திடீரென பிக்பாஸில் இருந்து விலகுவதாக நடிகர் கமல்ஹாசன் அறிவித்தார். அடுத்தடுத்து படங்களில் பிசியானதால் பிக்பாஸில் தொகுப்பாளராக தன்னால் தொடர முடியாது என கமல் கூறியதால், இவர் விலகியதற்கு பின்னர், அடுத்த பிக்பாஸ் தொகுப்பாளர் யார் என்கிற கேள்வி தான் தொடர்ந்து முன்வைக்கப்பட்டு வருகிறது.
இந்நிலையில் தான் பிக் பாஸ் சீசன்-8 தொகுப்பாளராக கமல்ஹாசனே ஒரு பிரபல நடிகரை ரெகமெண்ட் செய்திருப்பது பலரிடையே ஆச்சரியத்தை ஏற்படுத்தியுள்ளது. ஏனெனில் அந்த நடிகர் அப்படிப்பட்டவர்… நடிகர் கமல்ஹாசன் பிக் பாஸ் ஷோவை தொகுத்து வழங்கியது போல் யாராலும் தொகுத்து வழங்க முடியாது, ஏனெனில் கமல்ஹாசனுக்காகவே பலரும் பிக் பாஸ் நிகழ்ச்சியை கண்டு களித்தனர்.
அந்த வீட்டிற்குள் நடக்கும் சண்டையை கச்சிதமாக கையாண்டும், அதற்கான சரியான தீர்வும் கமல் வழங்கி இருந்தார். இந்நிலையில் தான் பிக்பாஸில் இருந்து கமல் விலகியது ரசிகர்களிடையே அதிர்ச்சியை ஏற்படுத்தியுள்ளது. அதோடு அடுத்த தொகுப்பாளர் யார் என்ற கேள்வியும் எழுந்துள்ள நிலையில், ஏற்கனவே பிக் பாஸ் சீசன் 5 நிகழ்ச்சியின்போது கமல் உடல்நல குறைவால் மருத்துவமனையில் இருந்ததால்,
பிக் பாஸ் நிகழ்ச்சியை நடிகை ரம்யா கிருஷ்ணனும், பிக் பாஸ் அல்டிமேட் நிகழ்ச்சியை நடிகர் சிம்புவும் தொகுத்து வழங்கினர். இந்நிலையில் தான் இந்த முறை கமல் வெளியேறியதால் தற்போதும், இவர்கள் இருவரும் தொகுத்து வழங்குவார்கள் என எதிர்பார்க்கப்பட்ட சூழ்நிலையில், அது நடக்காத விஷயம் என்று சொல்லப்படுகிறது. ஏனெனில் கமல் தொகுத்து வழங்கும் போது பீக்கில் இருந்த டிஆர்பி, இவர்கள் தொகுத்து வழங்கும் போது சரிந்தது.
பின்னர் எப்போது கமல் மீண்டும் ரீ-என்ட்ரி கொடுத்தாரோ அப்போதுதான் டிஆர்பி மீண்டும் அதிகரித்தது. இந்நிலையில்தான் சிம்புவும், ரம்யா கிருஷ்ணனும் தொகுத்து வழங்கினால் டிஆர்பி வராது என வேறு சிறந்த பிரபலத்தை விஜய் டிவி தேடி வருகிறது. ஆனால் யானைக்கும் அடி சறுக்கும் என்பது போல நடிகர் கமல்ஹாசன் தொகுத்து வழங்கும் போதும், முதலில் பீக்கில் இருந்த டிஆர்பி, கடந்த இரண்டு, மூன்று சீசன்களில் சரிய தொடங்கியது.
ஏனெனில் இவர், பிக்பாஸ் மேடையை அரசியல் மேடையாக பயன்படுத்திக் கொண்டு பேசியது, அதோடு சில கண்டஸ்டன்டுகளுக்கு ஃபேவராக செயல்பட்டது என, பல விஷயங்களை எப்போது செய்தாரோ, அப்போதிருந்தே கமலின் பெயர் டேமேஜ் ஆனதுடன், பிக் பாஸ்-ன் டிஆர்பியும் சரிந்தது. இந்நிலையில்தான் பிக்பாஸுக்கும் கமலின் விலகல் பெரிதாக பாதிக்காது என்றும் சொல்லப்படுகிறது.
இதனை தொடர்ந்து, விஜய் டிவி, பிக் பாஸ் தொகுப்பாளருக்காக இரண்டு பேருடன் பேச்சுவார்த்தை நடத்தி வருவதும் தெரியவந்துள்ளது. ஒன்று விஜய் சேதுபதியும், மற்றொன்று சிவகார்த்திகேயனும் தான். இதில் கமல்ஹாசன், சிவகார்த்திகேயனை தான் ரெக்கமண்ட் செய்திருக்கிறார். ஏனெனில் சிவகார்த்திகேயன் விஜய் டிவியில் கண்டஸ்டண்டாக பங்கேற்று, Anchor-ஆக மாறி, இன்று தமிழ் சினிமாவின் டாப் நடிகராக வளர்ந்திருக்கிறார்.
இந்நிலையில் சிவகார்த்திகேயனுக்கு விஜய் டிவி ஏற்கனவே பழக்கப்பட்ட ஒன்று என்பதாலும், சிவகார்த்திகேயன் ராஜ்கமல் தயாரிப்பில் அமரன் படத்தில் நடித்திருப்பதால் அப்படம் வெளியாகும் போது அவர் இந்த நிகழ்ச்சி நடத்தினால் இதுவே படத்திற்கு ப்ரமோசனாக அமையும் என்பதால், சிவகார்த்திகேயனை, கமல் ரெக்கமண்ட் செய்ததாக கூறப்படுகிறது.
எது எப்படி இருந்தாலும் சிவகார்த்திகேயன் நிகழ்ச்சியை நடத்தும் போது கலகலவென இருக்கும், ஆனால் கமல் போல் கண்டிப்பாக நடத்துவாரா என்பது தெரியாது. அதோடு சிவகார்த்திகேயன் சின்னத்திரையில் இருந்து கஷ்டப்பட்டு போராடி வெள்ளித்திரை சென்றிருப்பதால், தற்போது அவர் மீண்டும் சின்னத்திரைக்கு வருவதும் கேள்விக்குறிதான். இந்நிலையில் தான் பிக் பாஸ் நிகழ்ச்சியின் அதிகாரப்பூர்வ தொகுப்பாளர் யார் என்று பொறுத்திருந்துதான் பார்க்க வேண்டும்.